Синер ќе се обиде да го надигра Ѓоковиќ за престижен трофеј, но и рекордна награда во тениската историја

Јаник Синер вечерва ќе се обиде да стигне до втора победа во серија над Новак Ѓоковиќ, а покрај триумфот за престиж и освојување на завршниот Мастерс, Италијанецот ќе има дополнителна мотивација во финалето.

Со оглед на перфектниот скор на турнирот во Торино, Синер има можност да стигне до рекордна парична награда со евентуален триумф против светскиот рекет број еден.

Во такво сценарио, Синер ќе биде побогат за 4,8 милиони долари, што ќе биде нов рекорд во однос на парична награда од еден турнир, а италијанскиот тенисер ќе стигне до неа благодарение на фактот што би имал пет победи од исто толку одиграни мечеви.

Само за учеството тенисерите добиваат по 325.500 долари, секоја победа во групата носеше по 390.000 долари, а полуфиналниот триумф над Медведев го збогати Синер за 1.105.000 долари. Наградата за победникот во финалето е дополнителни 2.201.000 долари.

Ѓоковиќ исто така ќе биде богато награден за своите успеси во Торино, но неговата максимална заработка може да достигне 4,41 милиони долари поради фактот што има еден пораз во групната фаза.

Сепак, српскиот тенисер има дополнителна мотивација и во фактот што за него победата би значела нов тениски рекорд, односно седми трофеј на завршните Мастерс турнири во кариерата.