Шкендија го купи талентираниот напаѓач на Брера Струмица (Фото)

Фудбалските клубови од Македонија знаат да си разменат фудбалери во текот на зимскиот преоден рок, но потегот кој го направи Шкендија беше доста неочекуван и пристигна без некоја посебна најава.

Тетовските „црвено-црни“ решија да исплатат посериозна сума за да го добијат талентираниот фудбалер на Брера Струмица, па така Ване Крстевски од вечерва и официјално е член на Шкендија.

Крилниот напаѓач потпиша 3,5-годишен договор и се претвора во најголемо зимско засилување во досегашниот тек на јануарскиот преоден рок, бидејќи иако има 20 години, веќе четири сезони е дел од Првата македонската фудбалска лига.

Крстевски одигра 17 натпревари за Брера во првиот дел од сезоната и овој сегмент од првенството го заврши со два гола.

– Среќен сум и задоволен што пристигнав во Шкендија. Благодарен сум за укажаната доверба и се надевам дека ќе возвратам со добра игра од моја страна. Ветувам максимална посветеност, – гласи првата изјава на Крстевски.