Познати три полуфиналисти во Купот, мечот Работнички-Шкупи презакажан за утре

Лошите временски услови беа причина што немаше услови за одигрување на скопското дерби Работнички-Шкупи во четвртфиналето на Фудбалскиот куп на Македонија, додека преостанатите три натпревари се одиграа во закажаниот термин.

Условите на терените не овозможија ни многу погодоци, па Македонија Ѓорче Петров и Воска Спорт изборија полуфинале со по еден гол на дуелите со Силекс и Брегалница.

Скопскиот тим го победи Силекс со голот на Алији од 66. минута, додека Воска Спорт славеше на гостувањето кај Брегалница благодарение на погодокот на Јашароски во 70. минута.

Тиквеш и АП Брера одиграа 1:1 во деведесетте минути, па таму имаше најдраматичен финиш, бидејќи полуфиналистот се решаваше на пенали. По осум серии, клучно беше промашувањето на Ѓорѓиевски, па Тиквеш обезбеди место во наредната фаза.

Натпреварот Работнички-Шкупи треба да се одигра утре на теренот на ФФМ, но без присуство на публика.