Марселино се збогувал со играчите, голема легенда ќе го води Олимпик против Ајакс

Кризата во Олимпик Марсеј кулминираше со закана од ултрасите кон фудбалерите и раководството, а тренерот Марселино решил да го напушти клубот.

„Лекип“ пренесува дека денеска шпанскиот стручњак се збогувал со фудбалерите и наскоро ќе биде потврдено дека тој нема да ја извршува функцијата, одлука која доаѓа во пресрет на настапот во Лига Европа.

Францускиот клуб не успеа да обезбеди место во Лигата на шампионите, а првичните информации се дека на дербито со Ајакс на клупата ќе седи клупската легенда Жан-Пјер Папен.

Освојувачот на „Златната топка“ во 1991 година му е советник на претседателот на клубот од минатата година, а сега барем привремено би ја извршувал и тренерската функција.

Марселино дојде како наследник на Игор Тудор и го водеше Олимпик на само седум официјални натпревари.