Макпетрол значително ја намали цената на природниот гас и CNG

Компанијата „Макпетрол“ АД денеска преку соопштение до медиумите информираше за новите значително намалени цени на природниот гас и на погонското гориво метан (CNG) наменето за моторните возила.

Во соопштението се спомнува дека ваквото намалување се должи на договорот на „Макпетрол“ со „Гаспром експорт“, како и со движењето на цените на светските берзи.

– Согласно договорот помеѓу „Макпетрол“ АД Скопје и „Гаспром експорт“, како и движењето на цената на природниот гас на светските берзи, „Макпетрол“ АД Скопје ги известува своите потрошувачи и пошироката јавност дека цената на природниот гас за месец ноември ќе се намали за 500 евра за 1000 нормални метри кубни, во однос на цената за месец октомври ова година.

– Воедно, сакаме да информираме дека малопродажната цената на погонското гориво за моторни возила, Метан (CNG), кој се продава на бензинските станици на Макпетрол се намалува за 49,5 денари за килограм во однос на цената од минатиот месец која изнесуваше 184 денари за килограм, односно новата цена ќе биде 134,50 денари за килограм или 96 денари за литар,- се наведува во соопштението.