Лазаров: Ако во нешто сме први на ова Европско првенство…

Специјален известувач за „Дерби“ од Берлин, Ристе Влахов

Кирил Лазаров и неговиот стручен штаб и прави последните подготовки за последниот меч во групната фаза на Европското првенство, оној против Швајцарија кој го играме денеска во 18:00 часот.

По двата убедливи порази од фаворизираните Франција и Германија, нашите ракометари сигурно ќе сакаат да се докажат во дуелот со Швајцарците, кои пак на последниот меч кој го одиграа во Берлин покажаа дека не се нималку наивен противник.

Селекторот Лазаров смета дека Швајцарија влегува како фаворит во пресметката со Македонија, но истовремено верува во победа и се надева дека нашиот тим конечно ќе го реши проблемот и ќе почне да наоѓа решенија за поставеност „шест на шест“.

– Не чека тешка работа, но ако некаде имаме било какви шанси за победа, тоа е Швајцарија. Од друга страна, свесни сме за нивните квалитети, видовме како одиграа против Франција и затоа им ја предаваме фаворитсата улога. Ние ќе дадеме се од себе, треба да бидеме концентрирани и фокусирани за да оствариме посакуван резултат.

– Се согласувам со вас новинарите, треба да поправиме доста работи во нашата игра. Ако во нешто сме први на ова Европско првенство, тоа се техничките грешки. Ќе гледаме да ги намалиме што е можно повеќе против Швајцарија. Во ракометот некогаш самите правите технички грешки, но понекогаш противникот со својата одбрана во наведува да го правите тоа. Се надевам дека нема да биде така против Швајцарија, особено ќе биде важно да бидеме добри на поставена одбрана и играта „шест на шест“. Ако успееме да го поправиме тоа, ќе имаме добри шанси за позитивен резултат, – изјави Лазаров.