Ѓорческа по маратонски меч до четвртфиналето на турнирот во Скопје

Најквалитетната македонска тенисерка, Лина Ѓорческа избори место меѓу осумте најдобри на фјучрсот во Скопје „Триглав опен“ што се игра за награден фонд од 40.000 долари.

Лина исто како и вчера имаше напорен, исцрпувачки меч, овојпат со 16.та носителка Рина Саиго од Јапонија. Борбената Саиго даде се од себе, па Ѓорческа мораше добро да се потврди да ја мине и се пласира во четвртфиналето.

Првиот сет донесе огромна борба, истиот траеше 1 час и 15 минути, односно беше решен во тај-брејкот во кој Рина беше подобра со 7-3. Во продолжението стигна одговорот од нашиот рекет, тетовката заигра на повисоко ниво и со 6-2 и 6-2 ја мина оваа пречка, поточно закажа соочување со Сада Нахимана од Бурунди.

Африканката има 22 година, во моментов е 292 на ВТА листата, а во Скопје го има статусот на осма носителка.