Ѓоковиќ загуби сет, но ја мина првата пречка на Ју-Ес Опен

Новак Ѓоковиќ е фаворит број еден за освојување на Ју-Ес Опен, а утринава веќе ја мина првата пречка во битката за уште еден грен-слем трофеј.

Српскиот тенисер можеби неочекувано загуби сет од квалификантот Холгер Руне од Данска, но релативно лесно ги доби трите сета потребни за победа од 3:1.

Ѓоковиќ тргна убедливо и го доби првиот сет со 6:1, но следуваше одличен втор сет на Руне, во кој Данецот избори тај-брејк и таму изненадувачки беше поуспешен од големиот фаворит.

Подоцна, светскиот рекет број еден ја заврши работата, добивајќи ги следните два сета со 6:2 и 6:1, обезбедувајќи место во втората рунда.

Таму Ѓоковиќ повторно има противник кој не е дел од Топ 100, а се работи за Холанѓанецот Талон Грикспор.