Алкарас ја освои „црвената група“ и закажа спектакл со Ѓоковиќ во Торино (ВИДЕО)

Најдобриот шпански тенисер, Карлос Алкарас е последниот патник во полуфиналето на АТП завршниот турнир кој се игра во Торино.

Во првиот денешен меч во поединечна конкуренција, Карлос го надигра Данил Медведев со 2-0 и со тоа ја освои „црвената група“, а со тоа воедно закажа спектакл во полуфиналето со оглед на тоа што ривал ќе му биде првиот светски рекет Новак Ѓоковиќ.

Алкарас одигра квалитетно, одлично го чуваше својот сервис, а во исто време двапати му го одзема на противникот со што беше доволно да дојде до триумф од 6-4 и 6-4. Во првиот сет клучниот момент се случи во седмиот гејм, додека пак во вториот разликата беше направена во деветтата „игра“ по што Шпанецот поведе со 5-4 и потоа рутински на свој сервис ја заврши работата.

Со ова Шпанецот поведе со 3-2 во меѓусебните дуели со Данил, резултат до кој ќе се обиде да дојде и утре против Ѓоковиќ со оглед на тоа што во дербито ќе влезат со 2-2. Во вториот полуфинале домашниот фаворит Јаник Синер ќе излезе на мегдан со Медведев.