Циндриќ: Вардар е подготвен за најголемо изненадување на Ф4 турнирите

За „Дерби“ од Келн,
Александар Табаковски

Вардар утре игра историски натпревар против Барселона, а и онака големиот успех со пласманот на фајнл-фо турнирот, може да биде надграден со приближување уште еден чекор до европската титула. Лука Циндриќ е еден од лидерите на македонскиот првак, а ова се неговите размислувања во пресрет на утрешното полуфинале во Келн.

– Барселона е големо ракометно име, којзнае кое фајнл-фор учество е за нив, а и кога ќе ги погледнете играчите со кои располагаат станува јасно кој ќе ни биде противник. Тоа е нивна предност, но нам оваа сезона не краси младост и брзина, игравме многу натпревари и се подготвивме за овој турнир, се надевам дека нема да не изненадат со нешто, – вели Циндриќ.

– Психолошката подготовка е најважна за ваков натпревар во кој постојано сте под стрес. Ние се обидуваме постојано да разговараме меѓу себе и со тренерот, да бидеме подготвени за секакво сценарио, бидејќи студените глави можат да бидат пресудни во ваква фаза.

Дали ако можеше, би ја избрал Барселона во полуфиналето.
– Мислам дека нема некоја голема разлика, сите тимови се тука некаде според квалитетот и ако сакаш да играш финале, мора да одиграш голем натпревар, – потенцира Циндриќ.

Дуелот Вардар-Барселона е и дуел меѓу двајца шпански тренери…
– Тоа е навистина интересно, а досега се покажа дека ни одговара таква ситуација. Сепак, ќе одлучуваат ситници и детали, сигурно ќе биде тежок натпревар за двете екипи, а факт е и дека добро се познаваме.

Ако нема простор за големи изненадувања, што ќе го одлучи победникот?
– Сметам дека големо влијание на резултатот ќе имаат голманите, веќе видовме дека на Ф4 тешко можете да добиете натпревар ако немате расположен голман и добра одбрана.

Дали титулата на Вардар би значела поголемо изненадување од тие кои ги направија Флензбург, Кјелце, Хамбург…?
– Мислам дека тоа би било поголемо изненадување, затоа што не само што ние учествуваме првпат, туку имаме и многу млади ракометари во составот кои не биле дел од ваков настан.

Натпреварот Вардар-Барселона се игра утре од 18 часот.