Србија се најде во иста група со Косово, извлекувањето мораше да биде повторено (Видео)

Водечките луѓе на европскиот ракомет денеска ја организираа ждрепката за квалификацискиот циклус за Европското првенство, при што беше дознат распоредот на осумте групи.

Македонија имаше поволно извлекување и доби група по мерка во квалификациите, но од настанот кој се случи во Копенхаген, за издвојување е и еден момент од средина на ждрепката.

Косово како извлечена селекција од последниот шешир чекаше свој противник од вториот барабан, а судбината посака да биде извлечена репрезентација на Србија.

Познатиот Љубомир Врањеш кисело се насмеа откако виде дека беше извлечена Србија, но одговорните лица веднаш нагласија дека извлекувањето ќе биде повторено.

Поради сложената политичка состојба, ЕХФ забрани овие две репрезентации да бидат во иста група, па извлекувањето беше повторно изведено и Србија на крајот заврши во групата 4 во која се и Шпанија, Италија и Летонија.