Скјавоне: Ѓоковиќ не е фаворит за титулата во Торино

Заврши групната фаза на АТП завршниот Мастерс во Торино, па денеска и утре следуваат главните борби, поточно полуфиналните пресметки и секако борбата за пехарот.

Паровите се Јаник Синер-Данил Медведев и Новак Ѓоковиќ-Карлос Алкарас што е гаранција за елитен, супер квалитетен тенис во кој останува да се види кој ќе го има последниот збор.

Ѓоковиќ е најискусен на оваа сцена, има остварено најмногу успеси, титули, но според поранешната тенисерка Франческа Скјавоне тој не е главен фаворит за „насловот“ во Торино.

-Јаник и Новак го одиграа мечот во три сета како да беше предизвикот кога играа Новак, Рожер и Рафа, сите бевме залепени за ТВ восхитувајќи се на големата тројка. Единствено што се прашувам е дали овие деца од таа наследна генерација, Синер, Руне и Алкарас ќе успеат така да одиграат во пет сета, ако успеат ќе имаме врвен тенис како пред десет години.

-Според мене, Ѓоковиќ не е фаворит за финалето на АТП, но има способност не само да си ја врати силата, туку и концентрацијата. Анализирањето на мечот со Јаник ќе му даде поинаква платформа за полуфинале, со поинаков дух и концентрација, -порача Италијанката која своевремено го освои Ролан Гарос.