Сигурдсон блиску до остварување на првата цел: Хрватска ја победи Германија и стигна на чекор од Олимписките игри

Хрватска го трасираше својот пат кон Олимпискиот турнир во Париз, откако четата на Дагур Сигурдсон денеска најде решение и за селекцијата на Германија.

Исландскиот стручњак пристигна како наследник на Перковац на клупата на Хрватска, а веднаш беше јасно дека прва негова голема цел ќе биде да го одведе тимот на Олимписките игри.

„Коцкестите“ сега се многу блиску до такво нешто и само чудо ќе ги остави без главниот турнир во Париз, бидејќи треба да се поклопат многу математики, а воедно и да не слават на последниот меч во квалификациската група.

По победата над Австрија, Хрватите денеска беа подобри и од Германија во Хановер, а клучно беше првото полувреме во кое избраниците на Сигурдсон отидоа на 16:10, а потоа мирно ја одржуваа предноста и победија со 33:30.

Разиграниот Мартиновиќ кој постигна девет гола против Австрија повторно беше најдобар играч во хрватските редови, бидејќи денеска постигна осум погодоци во мрежата на Германците. По пет реализации во победничкиот тим имаа Дувњак и Шоштариќ.