Прва победа во новата СЕХА сезона: Вардар го надигра Партизан во фантастична атмосфера во „Јане Сандански“

„Комити“ направија одлична најава за балканското ракометно дерби против Партизан уште пред десетина дена, а денеска се погрижија за одлична атмосфера во „Јане Сандански“ и тоа беше дополнителен потстрек за ракометарите кои одлично одговорија на паркетот и славеа со 31:26.

По стартниот пораз во новата СЕХА сезона, Вардар ја запиша првата победа во втората рунда, покажувајќи дека е доста подобар противник од Партизан во овој момент.

Македонскиот првак првпат поосетно се одлепи по 18 минути игра кога поведе со четири гола разлика, па иако гостите од Србија се вратија и одржуваа егал до 19:19 во вториот дел, беше јасно дека Вардар е тој кој решава за случувањата на теренот.

Избраниците на Недановски покажаа класа кога беше најпотребно и повторно се одлепија на семафорот, што во случајот беше дефинитивна предност за победа од пет голови разлика.

Македонските репрезентативци Талески и Манасков доминираа со по девет, односно осум постигнати гола, фантастичен беше и Столе Стоилов кој постигна седум погодоци, а разбранет беше и Томовски кој мечот го заврши со 13 интервенции.