Портнер: Знам што ги чека Македонците ако не обезбедат следна фаза

Македонија својата шанса за пласман во следната фаза на Европското првенство најверојатно ќе ја бара на третиот натпревар против Швајцарија, а истиот се очекува да биде и клучен за избраниците на Кирил Лазаров во оваа прва фаза од шампионатот.

Членовите на сите репрезентации веќе се подготвуваат за стартот на континенталниот турнир и во фокусот се првите натпревари кои се играат утре, оние меѓу Македонија и Франција и Германија против Швајцарија.

Според ЕХФ рејтингот и традицијата, Македонија и Швајцарија важат за аутсајдери во групата А, па јасно е дека во двата тима дел од мислите се насочени кон третиот меч во групната фаза.

Никола Портнер како чувар на мрежата е вистински лидер на Швајцарците и важи за ракометар со големо реноме, а токму тој даде една интересна изјава за „македонскиот менталитет“ во една од најавите за Европското првенство.

– Франција и Германија се две ракометни нации и се апсолутни фаворити во групата. И Македонија е ракометна нација, но резултатите не им се така добри. Поради моите балкански корени, добро го познавам македонскиот менталитет.

– Тие имаат „болни“ очекувања, ќе фрлат се на една карта и ќе се надигруваат, но ако не се пласираат понатаму, тоа ќе биде прифатено како трагедија. Медиумите и навивачите знаат да бидат навистина сурови, – гласи изјавата на Портнер во интервјуто за „Хендзон“.