Норвешка се врати од голема негатива и го освои деветтото европско злато

Женската ракометна репрезентација на Норвешка го победи скандинавскиот ривал Данска во финалето на Европското првенство (27:25) и ја освои деветтата титула на континенталното натпреварување.

Почетокот и првото полувреме не навестуваа ваков епилог, данската репрезентација два пати имаше плус пет во првиот дел, а полувремето го доби со резултат 15:12.

Во вториот дел Данска имаше 22:18, но Норвежанките се вратија во натпреварот, а во последните минути направија плус два, предност која ривалките не успеаја да ја неутрализираат.

Најдобриот стелец на турнирот, Нора Мерк беше најефикасна на теренот со 8 гола, додека кај Данска, Бургард реализираше пет пати.

Норвешка ја одбрани европската титула, стигнувајќи до деветтиот трофеј во „Стожице“, со што е ставен крај на успешното Европско првенство чии коорганизатори беа Македонија, Црна Гора и Словенија.