Македонија не го искористи доброто прво полувреме за почетен триумф во квалификациите

Македонската кошаркарска репрезентација ги отвори квалификациите за ЕП со пораз (69:74) во дуел со Естонија, неуспех на домашен терен кој ги намалува шансите за пласман на завршницата на Евробаскетот во 2025 година.

Избраниците на Алек Јончевски беа подобар противник во првото полувреме и посебно во вториот период, во кој стигнавме до позитива од девет поени, а на пауза се замина со плус седум во корист на Македонија.

Естонците сепак брзо го возвратија ударот и го започнаа третиот период со серија со која стигнаа до водство 43:45, а периодот го завршија со плус четири.

Првиот противник на Македонија во групата се снајде подобро и во последната делница, постојано водеше, па на крајот иако ја намаливме негативата, немаше време за целосен пресврт во СРЦ „Кале“. Во овој период повреда заработи и Нено Димитријевиќ, па принудно пропушти дел од клучните моменти на теренот.

Димитријевиќ со 25 и Хап со 18 поени беа најефикасни во македонскиот состав, додека Вене и Котсар стигнаа до 16 поени во редовите на победничката селекција.

Следен противник на Македонија е Полска на 26. февруари.