„Л’Екип“ открива скандал во Франција: Некои претседатели на клубови ургирале кај Макрон да се прекине првенството

Многумина останаа изненадени кога француската влада одлучи да забрани секакви спортски случувања до септември и со тоа да стави точка на актуелното фудбалско првенство во кое многу работи останаа нерешени.

Франција беше меѓу првите земји со Белгија и Холандија кои ги прекинаа првенствата, а останатите лиги се очекува да продолжат во следниот период.

По ваквата одлука беше донесена дополнителна одлука ПСЖ да стане шампион, а Амиен и Тулус да се преселат ранг подолу.

Еден од најпознатите француски тимови, Лион, по ваквата одлука не успеа да се избори за настап во Европа, па токму затоа упати и тужба до француските фудбалски власти.

Сега, „Л’Екип“ открива дека зад ова се крие „матна игра“ затоа што некои клубови инсистирале директно кај претседателот Емануел Макрон првенството да биде прекинато.

– Има претседател кој јасно ми кажа дека цела саботна вечер ја поминал со своите пријатели кога ги побарале Емануел Макрон и премиерот Едуард Филип за да ургираат првенството да биде прекинато, -изјави новинар на „Л’Екип“.

На ваквите најави со коментар веднаш се јави првиот човек на Лион, Жан Мишел Ола кој побараа јавно да бидат обелоденети имињата на тие претседатели на клубови.