Кам-бек после 15 години: Давитков се враќа во мак-баскетот за да му помогне на клубот во кој последно работеше

Јорданчо Давитков последната задача во нашата земја ја имаше како селектор на најсилната македонска репрезентација, но сепак неговото последно искуство во мак-баскетот, односно Првата лига датира од 2008-ма година.

После цели 15 години, искусниот кошаркарски стручњак реши да го прифати повикот на Струмица и да се врати во македонската кошарка, а целта ќе биде да му помогне на тимот кој е најслабо рангиран во нашата лига.

Давитков последно на клупски план во Македонија работеше токму во Струмица, а судбината посака да се врати во овој град и да се приклучи на проектот најмалку до крајот на сезоната.

Екс селекторот доаѓа со јасна цел да му помогне на тимот кој е последен на табелата со само две победи на 13 одиграни меча, а веста за пристигнувањето ја потврди и Струмица преку социјалните мрежи.

Давитков последните неколку години работеше во странство, но покрај тоа што ја водеше Струмица, во минатото беше тренер во Македонија и на Никол Ферт, Поло Трејд, Балкан, Неметали Огражден и Работнички.