Ивановски и Поп Арсова со рекорди до македонска доминација на Скопскиот маратон

Македонските претставници Дарио Ивановски и Андријана Поп Арсова се победници на Скопскиот маратон кој денеска се одржа низ улиците на главниот град.

Ивановски ја истрча маратонската делница за 2:21:27 часа, додека Поп Арсова победи со време 2:40:36, при што и двата резултата се нови македонски рекорди на оваа делница.

На победничкиот пиедестал во машка конкуренција беа и Младен Стевановиќ од Босна и Херцеговина и Давид Перлич од Германија, додека Александар Кираџиев го освои четвртото место.

Кај маратонките, второто место и припадна на Силвија Јукаила од Еквадор, додека третото и четвртото место го освоија Билјана и Весна Кираџиева.

Македонска претставничка победи и на полумаратонската трка, а тоа е Милјана Ристиќ, која го освои првото место со време 1:26:09, додека кај мажите во оваа конкуренција триумфираше Митко Ценов од Бугарија.