Грција долго се потеше против Јордан, но го скрши отпорот во последната четвртина

Грција денеска го имаше својот прв натпревар на Светското кошаркарско првенство и во принцип требаше да има лесна задача против Јордан, но на крајот се стави во ситуација да го вади најдоброто на крајот.

Нашиот јужен сосед одлично го отвори мечот и брзо создаде двоцифрена предност, но опуштањето во втората четвртина резултираше со неочекувано враќање на Јордан на само минус три.

Аутсајдерот парираше по малку и во третиот период, но во последната четвртина целосно се распадна и на крајот Грција забележа убедлива победа од 92:71.

Победи во првиот дел од саботната програма остварија и Бразил и Порторико, со тоа што селекцијата од Карибите имаше доста тежок меч.

Бразил го декласираше Иран со 100:59, додека Порторико после продолженија го совлада Јужен Судан со 101:96.