Недановски: Oва не е вистинската слика за Вардар!

Тимот на Вардар дојде до првото славје во новата сезона во СЕХА лигата и тоа против составот на Партизан кого го совлада во СЦ „Јане Сандански“ со 31-26.

Ова беше средба во која „црвено-црните“ се прикажаа во многу подобро светло од пресметката со Татран Прешов, но според тренерот Владо Недановски истата не е вистинската слика за Вардар, поточно очекува овој состав дополнително да заблеска во продолжението од кампањата.

-Ова беше возбудлив меч во кој навивачите можеа да уживаат. Партизан има добар, млад ростер способен да игра модерен, брз ракомет. Кога станува збор за нас, заморот од Светското првенство сè уште е видлив и сигурен сум дека ова не е вистинската слика за Вардар.

-Чувствувам дека искуството и квалитетот на нашите играчи го одлучија овој меч. Тоа беше клучот. Уште еднаш ќе кажам дека верувам дека овој тим ќе изгледа многу подобро откако ќе добиеме сè во синхронизација. На крајот, морам да им се заблагодарам на најдобрите навивачи на светот. Тие навистина нè туркаа во клучните моменти во средбата. -порача Недановски.

Следниот натпревар за Вардар е против Татран Прешов на 10 февруари.