Нагелсман смета дека Баерн ја поштедил Барселона од поголем срам

Барселона има ужасен биланс со Баерн Минхен на последните четири меча на кои претрпе исто толку порази, но посебно катастрофална е статистиката на последните три.

Баварскиот великан постигна вкупно 14 гола во мрежата на Барселона, а прими два на трите натпревари одиграни од 2020-та година до вчеравечер, па со победата од 3:0 на „Алијанц арена“, Баерн го потврди стопроцентниот ефект во групната фаза во Лигата на шампионите.

Германскиот првак ја победи Барса со 0:3 и на „Камп Ноу“, а ако на оваа анализа се придодадат и историските 8:2 од 2020-та година, станува јасно дека Баерн веќе извесно време е табу тема за фудаблскиот великан од Каталонија.

Чави по мечот призна дека Баерн бил супериорен и на друго ниво за неговиот тим, додека Јулијан Нагелсман смета дека неговиот тим го поштедил противникот од уште посрамен пораз, бидејќи неговите играчи пропуштиле неколку стопроцентни шанси.

– Одработивме перфектна групна фаза во Лигата на шампионите и победивме на сите натпревари. Ако ги анализираме само овие 90 минути против Барселона, ќе кажам дека имавме многу повеќе шанси за гол и можевме да постигнеме уште неколку погодоци во нивната мрежа. Резултатот можеше да биде многу повисок.

– Како и да е, задоволен сум од победата и од квалитетот кој го покажа тимот. Доминиравме против добро познат ривал, нив им требаше победа, но и ние се прашувавме нешто на оваа средба. Во ниту еден момент не бевме релаксирани и стигнавме до тоа што го заслуживме. Ова е Баерн Минхен, наша цел е да ја освоиме титулата во Лигата на шампионите, – порача Нагелсман.