Лазаров: Имаме свој идентитет во играта, Македонија може да стане Норвешка!

Остануваат само уште неколку дена до настапот на Светското првенство на кое Македонија во првата фаза ќе игра во групата Ф каде ќе ги одмериме силите со Холандија, Норвешка и Аргентина.

Првиот меч ни е на 13 јануари, а пред патувањето за Полска националниот тим предводен од селекторот Кирил Лазаров оддржа пресконференција на која беа искажани очекувањата пред овој нов голем настан за репрезентацијата.

-Пред нас е СП, имавме четири контролни натпревари со квалитетни ривали на кои имавме можност да ја темпираме формата. Вложивме многу труд, ентузијазам и борба за да дојде до овој Мундијал, бидејќи во меѓувреме направивме смена на генерација. Потребна им е поддшка на овие момци, успеавме да минеме два баражи против Романија и Чешка, дадовме шанса за оваа генерација да продолжи по стапките на нас повозрасните. Тие заслужуваат пофалба за остварените резултати, но и воедно треба да им се даде охрабрување за предизвиците што се пред нив во Полска, -истакна Лазаров кој верува дека за брзо време Македонија може игра ракомет како Норвешка.

-Во првото коло играме со нив, верувам дека за брзо време, Македонија ќе стане Норвешка. Тоа е селекција која се бори за медали. Ние имаме свој идентитет во играта, што е тешко бидејќи низ годините игравме бавен ракомет и тоа беше наш заштитен знак. Не знам дали тоа ќе биде доволно за да се победува или да се губи, но верувам дека сме на вистинскиот пат, -порача предводникот на македнската селекција.