Трет неуспех за надежите во квалификациите за ЕП: Грузија славеше во Скопје

Македонската репрезентација до 21 година го претрпе третиот пораз во квалификациите за пласман на Европското првенство во 2025 година кое се игра во Словачка.

Избраниците на Канатларовски загубија од Грузија со 1-0 на средбата која се одигра на тренинг-центарот „Петар Милошевски“ во Скопје.

И на овој дуел нашата селекција покажа слабости, не успеа да се наметне, да создаде шанси и тоа донесе нов негативен резултат. Клучниот момент се случи во 54 минута кога Маматашвили постигна убав гол од далечина.

До крајот ние имавме само една посериозна прилика кога по една мешаница во шеснаесетникот на Грузија топката за малку не ја мина гол линијата на противничкиот гол.

Во финишот беа доделени и два црвени картони од кои едниот беше за нашиот капитен Илиевски.

Со 3 освоени бода Македонија се наоѓа на 5. место во Ц групата.