Шок за италијанските фанови: Суспендираниот судија на „чизмата“ доби подарок во ЛШ

Италијанските медиуми и денеска пишуваат за контроверзното судење на Марко Ди Бело на петочното дерби меѓу Лацио и Милан, интернационалниот арбитар доби многу критики и од своите повозрасни колеги, но тој денеска си доби убава честитка од федерацијата и УЕФА.

Ди Бело го испушти од контрола дуелот во Рим и додели три црвени картони за домашниот тим, заработувајќи многу забелешки за начинот на кој го менаџирал дуелот, а медиумите пренесоа дека ќе оди на принудна пауза поради своето издание во петокот.

Контроверзниот судија нема да суди во Серија А најмалку еден месец поради пропустите на „Олимпико“, но денеска е назначен за четврти судија на дуелот од Лигата на шампионите меѓу Реал Мадрид и РБ Лајпциг, па целосно неочекувано, ќе биде дел од италијанската судиска постава, на дуелот на кој нашиот Елиф Елмас и соиграчите ќе бркаат четвртфинале против шпанскиот ривал.

Иако на хартија нема важна улога во однос на арбитражата, сепак не треба да се потцени фактот што е официјален асистент, а исто така ќе треба да го замени главниот судија во случај тој да се повреди и да не може да ја изврши својата задача.

Главен судија ќе биде Давиде Маса, додека во ВАР собата е делегиран тандемот Ирати-Валери.