Били Џин Кинг куп: Македонските тенисерки го совладаа првиот носител Финска

Македонската женска тениска репрезентација успешно го започна настапот во третата европска зона на Били Џин Кинг купот во Скопје, совладувајќи ја Финска која беше поставена како прв носител и фаворит за првото место во групата.

Избраничките на селекторот Димитар Лабудовиќ не разочараа пред своите фанови на терените на ТК Југ и денеска остварија важна победа со резултат 2:1, која е веќе трета во групната фаза.

Финските тенисерки имаа посакуван старт бидејќи Хиетаранта ја совлада Стоилковска со 2:0 во сетови, но нашата најдобра тенисерка Лина Ѓорческа славеше на вториот сингл меч, со што стана јасно дека резултатот во дубл ќе биде решавачки за победникот од дуелот.

Ѓорческа ја победи Куликова со 2:1 во сетови, во меч во кој мораше да прави пресврт, за подоцна заедно со Стоилковска да слават против Хиетаранта и Куликова со поубедливи 2:0 во сетови.

Противник на Македонија во утрешното четврто коло ќе биде Исланд.