Лазаров: Горд сум, ова е голем успех за македонскиот ракомет

Алкалоид го доби реваншот со Баја Маре со убедливи 32-25 и обезбеди билет за полуфиналето на Европскиот Куп на ЕХФ.

Алкалоид му одржа лекција на Баја Маре и обезбеди полуфинале во Европскиот Куп

Македонскиот прволигаш го надигра и му одржа лекција на романскиот претставник и сосема заслужено оди во наредната фаза каде за ривал ќе го има Рунар од Норвешка, состав кој за место во Топ 4 го мина грчки Олимпијакос.

-Среќен сум и задоволен, можеби се уште не ја чувствувам таа среќа затоа што ни почнува плејофот во првенството. Немаме време да се израдуваме, но така е во професионалниот спорт, на високо ниво. Ова е голем успех играчите, клубот, македонскиот ракомет, клуб составен од 95 проценти од македонски играчи да се пласира во едно европско полуфинале. Тоа ме прави мене горд, се надевам дека и луѓето од клубот исто.

-Што се однесува до натпреварот, честитки до момците за пристапот, сериозноста, пожртвуваноста и борбата која треба да ја покажуваат и пласманот во полуфиналето. Се чувствува во дадени моменти дека ни фали искуство, рутина да бидеме подобри. Сум задоволен од пласманот и мислам дека треба да тежнееме во некои сегменти да имаме подобра реакција и подобри автоматизми. Како и да е, ова е огромен успех и одиме на норвешниот преставник Рунар. Од оние информации кои ги имам, се уште ги немам гледано, но ќе ни очекува еден атомски ракомет. Се надевам на уште подобро изданија во иднина, ама и сум свесен дека нема да биде лесно затоа што во ростерот го немаме нашиот најдобар играч Марко Митев, истакна тренерот Кире Лазаров.

Сега Алкалоид ќе треба да се фокусира на дерби средбата со Вардар во домашниот шампионат и тоа во рамките на првото коло на плејофот во Суперлигата.