ФФМ најави казна за срамните сцени во Тетово: За вакви нелуѓе нема место во фудбалот

Фудбалската федерација на Македонија реагираше брзо и со соопштение најави санкции за фудбалскиот клуб Шкендија, чии навивачи денеска предизвикаа скандал со недоличното однесување пред почетокот на прволигашкиот дуел со АП Брера.

Сите натпревари од актуелното коло започнаа со минута молк во чест на жртвите од трагедијата во Кочани, но навивачите на Шкендија решија да изразат целосно непочитување и краткиот период го исполнија со пеење, скандирања и свирежи.

Наместо молк, песна и свирежи: Навивачите на Шкендија не покажаа почит кон жртвите на трагедијата во Кочани

ФФМ неколку часа подоцна најави дисциплинска постапка, со соопштение кое ви го пренесуваме во целост.

– Фудбалската федерација на Македонија (ФФМ) отвора дисциплинска постапка против ФК Шкендија поради нечовечкото однесување на навивачите и непочитувањето на минута молк во чест на жртвите од трагичната несреќа.

– Овој чин претставува недопустливо непочитување кон загинатите и нивните семејства. ФФМ ќе преземе соодветни мерки согласно правилата со што ќе обезбеди вакви недолични постапки никогаш повеќе да не се повторат. За вакви нелуѓе нема место во фудбалот.

– Нека се огледаат на Шкендија Арачиново, која покажа достоинство и почит кон жртвите и целокупната ситуација во државата. ФФМ пред неколку недели веќе ги испразни трибините со гостински навивачи во Струга поради недолично однесување и тоа ќе важи за сите – без исклучок.

– Фудбалот мора да остане спорт на почит и достоинство, – стои во соопштението на ФФМ.