„Би-Би-Си“: Ред Бул донел безмилосна одлука за рокада на возачи по само две трки

Раководството на Ред Бул не е задоволно од еден важен аспект од првите две трки во новата Формула 1 сезона и синоќа била донесена важна одлука во пресрет на гран прито во Јапонија.

Лиам Лоусон, новиот тимски колега на шампионот Макс Ферстапен, потфрли на воведните возбудувања во Мелбурн и Шангај, па одговорните луѓе синоќа имале состанок во Дубаи и решиле да направат рокада меѓу двата тима на Ред Бул, тврди „Би-Би-Си“.

Местото на Лоусон ќе го заземе многу поискусниот Јуки Цунода, кој ќе добие привилегија да дебитира во првиот тим пред своите фанови на „Сузука“.

Британскиот медиум не добил коментар од Ред Бул за својата ексклузива, истовремено претставувајќи го потегот на тимот како најбезмилосен досега, имајќи го предвид фактот што 23-годишниот пилот од Нов Зеланд доби шанса на само две трки.

На трката во Мелбурн, Лоусон беше 18-ти во квалификациите и потоа не ја заврши трката, додека во Кина беше последен во квалификациите за спринтот и трката, а на крајот стигна до 14 и 12. место на двата натпревара.