ПСЖ покажа моќ во Битола, Еурофарм Пелистер стави крај на европското патување

Во натпревар без никакво резултатско значење и во кој се играше единствено за престиж, Еурофарм Пелистер успеваше да му парира на моќниот ПСЖ во првото полувреме, но македонскиот првак целосно потфрли во вторите 30 минути и на крајот се прости со убедлив пораз од новата епизода во Лигата на шампиони.

Битолчани успеваа да се држат и одржуваа минимална негатива, но ПСЖ почна да се одлепува во завршните минути од првиот дел и стана јасно дека избраниците на Раул Алонсо нема да можат да се носат со големиот фаворит.

Фактот што Еурофарм Пелистер немаше ниту едно водство во текот на 60-те минути доволно говори за вечерашниот натпревар, кој на крајот заврши со убедливи 26:35 за гостите од Париз.

Францускиот репрезентативец Пранди со осум гола беше нерешлива енигма за битолчани, Јахја постигна пет погодоци, додека светли точки во Пелистер беа Кузмановски со седум и Пешевски со четири погодоци.

Еурофарм Пелистер ја затвора оваа сезона во Лигата на шампиони со деветти пораз, а во овогодинешниот настап запиша и три победи и две реми средби, што секако е значителен напредок од минатата сезона.