Марк ја доби битката на браќата Маркез и се погрижи за перфектен старт во Дукати (Видео)

Марк Маркез го комплетираше својот импресивен викенд во Тајланд и оствари двојна победа на патеката Бурирам, бидејќи по вчерашниот триумф на спринтот, Шпанецот беше најдобар и на главната трка.

Осумкратниот светски шампион стана првиот возач по Кејси Стонер кој победил на својата дебитантска трка во боите на Дукати, што е јасен сигнал дека Маркез ќе ја напаѓа титулата оваа година после неколку лоши сезони кои беа пропратени со тешки повреди.

Марк стартуваше од најдоброто место на денешната трка и мирно го бранеше врвот во првите неколку круга, но во седмиот поради одреден технички проблем ја загуби лидерската позиција од својот брат Алекс.

Во боксот на Дукати настана мала паника во тој момент, но на крајот испадна дека не станува збор за посериозен проблем, што направи Марк да го следи ритамот на својот помлад брат. Пеко Бањаја љубоморно ги следеше и ги пратеше двајцата браќа во текот на целата трка, но актуелниот шампион во ниту еден момент не успеа да се приближи доволно за напад.

Братската битка не ескалираше и очекувано се возеше многу внимателно, па во такви услови, поискусниот Марк го мина Алекс на четири круга пред крајот, а потоа лесно ја одбрани првата позиција и ја оствари првата победа во официјалниот тим на Дукати.

– Вчера бев среќен, но денеска сум уште повеќе. Да победам во Тајланд заедно со мојот брат е остварување на сонот, – изјави Марк кој на најдобар можен начин ја стартуваше новата сезона.

Покрај водечката тројка, битката за четвртото место денеска му припадна на Морбидели во дуелот со Огура, додека меѓу првите десет се најдоа уште Беѕеки, Зарко, Биндер, Бастијанини и Ди Џанантонио.

🚨 @marcmarquez93 TAKES THE LEAD! #ThaiGP 🇹🇭 pic.twitter.com/VuqJywAHmp

— MotoGP™🏁 (@MotoGP) March 2, 2025

🏁 #MotoGP RACE 🏁 @marcmarquez93 CLAIMS A DOMINANT FIRST WIN WITH @ducaticorse 🏆#ThaiGP 🇹🇭 pic.twitter.com/3Xu6XE5wfv

— MotoGP™🏁 (@MotoGP) March 2, 2025