Еванжелиста и Жуис победници на Охридскиот пливачки маратон, Поп Ацев заврши на пиедесталот

Денешното 37-мо издание на Охридскиот пливачки маратон традиционално ја донесе на програмта 25-километарската делница од Св. Наум до градското пристаниште, а оваа година победници се Бразилец во машка, односно Французинка во женска конкуренција.

Бразилецот Матеус Еванжелиста беше најбрз денеска во водите на Охридското езеро и пристигна на целта за време од 5 часа, 45 минути и 5 секунди, додека зад него заврши Холанѓанецот Марсел Схауле кој оствари време од 5 часа, 46 минути и 50 секунди.

Веднаш зад него заврши најдобриот македонски маратонец Евгениј Поп Ацев, кој иако беше во игра за второто место, на крајот задоцни две секунди зад Холанѓанецот Схауле.

Тоа му овозможи на Поп Ацев да се искачи на пиедесталот и да запише уште едно одлично издание на Охридскиот маратон, на кој од година во година има се поголема конкуренција и во женска категорија.

Французинката Каролин Жуис беше најбрза кај дамите со време од 5 часа, 46 минути и 51 секунда, втора беше Мајте Пука од Аргентина, а трета Инес Делакроа од Франција.