ЖРК Атлетик – нов клуб на ракометната мапа: Целта е да се фокусираме на македонски играчи

Ракометот без никаква конкуренција е спорт број еден во нашата земја со години наназад, па како што одминува времето, така амбициите и плановите растат и се развиваат и кај клубови кои неодамна се формирани.

Последен доказ за такво нешто е Алкалоид кој успеа да оствари историски пласман во полуфиналето на Европскиот Куп на ЕХФ, приказна која треба да послужи како добар пример за некои останати новооформени клубови како што е случајот и со ЖРК Атлетик.

Женскиот ракометен клуб изминативе денови се промовираше на ракометната мапа во Македонија и целта е да се изгради структура која ќе донесе резултат на кадетско и сениорски ниво, амбиции за кои зборуваше и претседателот на клубот, Горан Стојков.

– Целите кои ги имаме како клуб се јасни, сакаме да обрнеме поголемо внимание со македонските играчи, да се фокусираме на македонскиот ракомет. Сметаме дека со нашето знаење и искуство кое го имаме стекнато во изминативе неколку децении ќе придонесеме за нешто ново, за нешто интересно на ракометната мапа.

– Во овој момент мислам дека машкиот ракомет е на завидно ниво и тоа е за поздрав, но треба да се обрне внимание и на женскиот ракомет. Ние сме тие што можеме да направиме нешто ново, некои што би донеле нови добри резултати во иднина.

– Документацијата за работа на клубот е изготвена, канцеларија имаме, а тренинзите и натпреварите ќе ги имаме во салата „Јане Сандански“. Сите простории ќе ни бидат овозможени за функционирање, исклучиво ќе работиме со македонски играчи и целта ќе биде од нив да изградиме играчи кои би донеле поголем квалитет во репрезентацијата, – вели Стојков.

Во ексклузивното интервју за „Спортско радио 90,3 фм“, господинот Стојков доби шанса да го презентира целиот проект на клубот, а комплетниот разговор проследете го на следниот ЛИНК