Богдановиќ ја напушта шаховската федерација, за минусот го обвини министерот

И покрај препораката на македонската влада за избегнување активности за време на прогласената седумдневна жалост, денеска во Скопје се одржува собрание на Шаховската федерација на Македонија, кое претходно беше закажано откако на 4 март досегашниот предводник Саша Богдановиќ поднел оставка.

Во писмото до делегатите, тој наведува дека ја немале потребната поддршка од ресорното Министерство за спорт, што е вовед кон извештајот за финансикото работење кој покажува дека долговите на федерацијата се зголемиле.

Во своето писмо тој укажа колку средства наводно добивале порано од Агенцијата за млади и спорт, но не и колку успеале да обезбедат од страна на Управниот одбор од други извори.

Иако со ковертирана оставка, Богдановиќ се предложи себеси за дел од работното претседателство и го води собранието.

Кандидати за негов наследник се неговиот досегашен соработник и член на УО, Воислав Мерџановски, додека групацијата на клубови кои обвинуваат за недомаќинско работење го предлага Оливер Деркоски.