Шкендија и Работнички не погрешија, Силекс не успеа да го скрши отпорот на борбениот Тиквеш

Фудбалерите на Шкендија славеа против АП Брера (2:1) во денешниот натпревар од Првата македонска фудбалска лига и максимално го искористија ремито на Силекс, кој во Кратово не успеа да го скрши отпорот на борбениот Тиквеш.

Искусниот Бесарт Ибраими постигна два гола, што беше доволно Шкендија да освои три планирани бодови против екипата од долниот дел на табелата, па сега стигна до вкупно 53 и четири бодови повеќе од второпласираниот Силекс.

Во Кратово, гостите први постигнаа гол преку Мишев во 31. минута, Додев четири минути подоцна донесе израмнување, а иницијативата на избраниците на Александар Васоски не донесе погодок за пресврт на тешкиот терен на кој се играше средбата.

Работнички уште еднаш сезонава стигна до победа со 1:0, овојпат победен е тимот на Беса со голот на Рушевиќ од пенал.

Струга и Шкупи одиграа реми без голови, додека Воска Спорт успеа да го победи Гостивар со 0:2.