Тренерот на Сосиедад огорчен: Реал е доволно голем клуб за да не добива ваква помош (Видео)

Реал Сосиедад можеби го одигра и најдобриот натпревар оваа натпреварувачка сезона, но и тоа не се покажа како доволно за да приреди големо изненадување на „Сантијаго Бернабеу“.

Гостите од Баскија приредија спектакл на гостувањето во Мадрид и успеаја да постигнат четири гола во мрежата на Лунин, но откако примија три во регуларниот дел, на крајот им пресуди оној на Ридигер во дополнителните 30 минути.

Тимот на Иманол Алгуасил немаше сили да реагира и да тргне по петти гол во самата завршница, па на крајот со вкупни 5:4 беше елиминиран во спектакуларното полуфинале во Копа дел Реј.

Тренерот на Сосиедад по крајот на мечот нагласи дека е горд на фудбалерите кои дале се од себе, но исто така испорача и жалење за ситуација во која смета дека Реал добил непотребна помош од судиите.

Реал израмни на 3:3 со гол од корнер, но на таа акција претходеше офсајд од Килијан Мбапе кој не беше досуден.

– Акцијата на Мбапе и Винисиус беше офсајд пред третиот гол на Реал. Тие акции обично секогаш се прекинуваат од судиите, но овојпат не се случи тоа. Реал Мадрид е навистина голем клуб и нема потреба да добива ваква помош. Убеден сум дека голот немаше да важи ако се случеше во противничкиот шеснаесетник, – изјави Иманол.

Видеото погледнете го ТУКА