Лапорта и одговори на Ла Лига: Ова нема да го дозволам…

Барселона вечерва го игра реваншот со Атлетико Мадрид во Купот на Шпанија, меч кој ќе го даде вториот патник во финалето или поточно противникот на Реал Мадрид, а случајно или не денеска Ла Лига одново го актуелизираше прашањето околу Дани Олмо и Пау Виктор.

Веќе е позната драмата околу нивната регистрација и целиот процес кој се водеше низ медиумите со тоа што Ла Лига остана на ставот дека клубот нема право на тоа, но Барса пронајде начин и досега двајцата играчи беа регистирани и настапуваа за екипата.

Ла Лига денеска излезе со жестоко соопштение, па иако од Барселона официјален одговор не стигна беше испратена директна порака од претседателот, Жоан Лапорта.

Ла Лига ѝ зададе нов непријатен удар на Барселона, на потег е Врховниот спортски суд

-Во врска со соопштението на Ла Лига, го гледаме како уште еден обид да се наруши имиџот на клубот и да се оди спротивно на интересите на ФК Барселона. Очигледно, клубот ќе одговори преку своите правни служби, кои темелно го разгледуваат писмото на Ла Лига. Ќе одговориме на најсилен можен начин.

-Поминаа три месеци откако реков дека регистрациите на Олмо и Пау Виктор беа правилно извршени следејќи ги сите барања на РФЕФ и Ла Лига, тоа останува точно. Имам чувство дека ова не е случајност. Денес играме финале и се надевам дека ќе биде одличен спектакл. Оживувањето на контроверзи од ваков вид не е случајно; тоа е уште еден обид да се дестабилизира нашиот тим. Чувството е дека бидејќи не можат да не победат на теренот, ќе се обидат да го направат тоа во канцелариите. Како претседател на Барса, тоа нема да го дозволам, -порача Лапорта.