Скапо се плати победата над Фулам: Артета доби ужасна вест на една недела пред четвртфиналето со Реал

Камбекот на Букајо Сака беше убедливо најдобар вест за Микел Артета и фановите на Арсенал на дерби пресметката со Фулам кој заврши со резултат 2:1, но оваа победа на „топчиите“ не беше ниту приближно иделна, од едноставна причина што истата скапо беше платена.

Артета сигурно нема да спие мирно во наредните неколку дена, а причина за тоа е повредата која ја заработи неговиот незаменлив стопер и играч кој требаше да биде гаранција во дуелите со Мбапе, Винисиус и Родриго во Лигата на шампиони.

Габриел заработи повреда без контакт од противнички играч и побара измена против Фулам уште во 15-та минута, а лошите сигнали кои ги демонстрираше не ветуваат ништо добро за менаџерот на Арсенал, но и фановите на клубот од Северен Лондон.

На една недела пред круцијалната пресметка со Реал на „Емирејтс“, Габриел се пожали на повреда на задната ложа и почетните реакции не изгледаат воопшто добро, па сега ќе треба да се случи чудо за да биде оспособен за првиот меч.

Покрај Габриел, натпреварот не го доигра и Тимбер, со тоа што Холанѓанецот беше неизвесен за настап и за овој дуел со Фулам.

– Нависитна не знаеме во овој момент што ќе биде со Габриел и Тимбер. Ќе правиме тестови и ќе дознаеме повеќе. Габриел почувствува нешто во задната ложа, не знаеме за колку голема работа станува збор. Јуриен имаше проблеми уште пред мечот и на крајот не можеше да го доврши истиот, – изјави Артета по победата од 2:1.