Недопирливиот Маркез го израмни историскиот потфат на Нијето во Аргентина

Црвената боја очигледно му донесе многу среќа на Марк Маркез, бидејќи осумкратниот светски шампион изгледа навистина недопирливи на стартот на новата сезона во Мото ГП шампионатот.

Трансферот во фабричкиот тим на Дукати според многумина беше последното нешто што му требаше на италијанскиот тим, но извонредниот Шпанец многу брзо почна да ги побива ваквите теории, и тоа со совршено возење на највисоката сцена.

Откако имаше перфектен старт на новата авантура со двојна победа во Тајланс, Маркез издоминира и на трката во Аргентина, повторно славејќи во дуелот со својот брат Алекс.

Маркез беше најбрз на вчерашниот спринт и одново освои максимални бодови во генералниот пласман, бидејќи победничкиот ритам го продолжи и на главната трка.

Иако имаше мали проблеми и во два наврати беше блиску до излетување од патеката, Марк успеа да добие нова битка со својот брат и да заврши прв, а уште подобра вест за него беше тоа што Пеко Бањаја заврши четврти, зад Франко Морбидели.

По импресивните два викенди, Марк има максимални 72 бода и има 16 повеќе од својот брат, односно 31 од својот колега во Дукати, Италијанецот Бањаја.

Инаку, за Маркез ова беше јубилејна 90-та победа во кариерата, па со тоа се израмни со славниот Анхел Нијето како трет на вечната листа. Пред него се само Џакомо Агостини со 122 и Валентино Роси со 115.