Милевски: Велс е сериозна репрезентација, има горчина…

Македонија беше многу блиску до втората победа во квалификациите за Светското првенство, односно до истата не делеа секунди во дуелот со Велс, ама фудбалот се игра до последниот судиски свиреж и во случајот за нас ни донесе болен удар затоа што примивме гол во 96 минута за конечни 1-1.

Токму поради ова во нашиот табор жалат што не беа освоени трите бода, поточно за испуштената шанса за освојување на целиот плен.

-Мечот да завршеше без голови, можеби ќе бевме позадоволни, вака останува горчината дека бевме многу блиску до трите бода, -истакна селекторот Благоја Милевски.

-Велс е сериозна репрезентација, составен од играчи кои настапуваат во најсилните лиги. Меѓутоа нашите фудбалери напредуваат од собир во собир и ни фали уште тој фактор плус за да бидеме над селекции како Велс. Не би рекол дека играчите се израдуваа пред време, не верувам дека момците од еуфоричност направија грешки, но такви моменти се случуваат, -додаде селекторот.

Во јуни не очекуваат пресметки со Белгија и Казахстан.