Аморим испорача брутална изјава откако Еланга му пресуди на Јунајтед со неверојатен гол

Манчестер Јунајтед беше далеку подобар ривал на „Сити Граунд“, па иако создаде доста повеќе шанси од домашниот тим, сепак не најде доволно добри решенија во завршната третина за да се опорави од почетниот шок.

Антони Еланга режираше неверојатен соло продор и постигна несекојдневен гол откако претрча најмалку 70 метри, погодок со кој режираше таканаречена „слатка одмазда“ против клубот во кој не доби вистинска шанса за докажување.

Еланга како поранешен талент на Манчестер Јунајтед сега дојде на ред да брилјира во Нотингем Форест, тим кој оваа сезона е изненадување на сезоната и состав кој цврсто чекори кон пласман во Лигата на шампиони.

Блесокот на Еланга вчера беше доволен за минимална победа на „шумарите“ од 1:0, па сосема очекувано, новинарите по натпреварот го прашаа Рубен Аморим дали би посакувал играч со квалитетите како стрелецот на Нотингем.

Португалскиот стручњак испорача брутален одговор и посочи дека Еланга не ја искористил својата шанса на „Олд Трафорд“, па во моментов нема потреба да се жали за играч кој не е ниту приближно во неговите планови.

– Не ми е тешко да гледам играчи како Еланга како имаат добри перформанси надвор од Јунајтед. Сите тие играчи требаше да покажат перформанси во дресот на Јунајтед. Не можеме да гледаме назад и да се навраќаме на играчи кои си заминаме. Тие ја имале својата шанса во Јунајтед и не ја искористиле, – брутално порача Аморим.