Јуриќ избега од Саутемптон откако постави неславен рекорд во Премиер лигата

Иван Јуриќ нема по добро да ја памети сезоната 2024/25, од една страна поради ужасни резултати кои резултираа со отказ во Рома, а од друга поради катастрофалното искуство во Премиер лигата кое го завршува ова утро.

Искусниот хрватски стручњак денеска ја активирал специјалната клаузула за ослободување во неговиот договор, според која Јуриќ од овој момент веќе нема никаква врска со Саутемптон.

Тимот од „Ст. Мери“ вчера официјално испадна во Втора лига откако загуби на гостувањето кај Тотенхем со 3:1, но условите во кои се случи тоа, направи Јуриќ да постави еден неславен рекорд.

Саутемптон е тимот кој најбрзо испаднал во една натпреварувачка сезона во Премиер лигата, бидејќи шансите за опстанок математички завршија на седум кола пред крајот.

Катастрофалниот период во Саутемптон на крајот го принуди Јуриќ да ја активира клаузулата и веднаш да си замине од клубот, па така неговиот циклус во Англија завршува после само 107 дена и малку веројатно е дека некогаш ќе добие нова шанса да работи на Островот.

За три ипол месеци минати во англиската елита, Јуриќ оствари само една победа во Премиер лигата (онаа над Ипсвич), па јасно е дека ниту еден фан на Саутемптон нема да жали за неговото заминување.