Артета не стравува од Реал: Преовладува едно чувство пред двете пресметки

Микел Артета се наоѓа пред нова завршница во која Арсенал најверојатно ќе заврши како второпласиран во Премиер лигата, но од друга страна, неговиот тим се уште е во игра во Лигата на шампионите, натпреварување во кое веќе долго време се очекува да направи позначаен исчекор.

Арсенал после 15 години ќе игра вторпат во низа во едно четвртфинале во Лигата на шампиони, но тимот на Артета не можеше да замисли и посака потежок ривал од оној што го доби.

„Топчиите“ ќе играат против најдобриот тим во Лигата на шампионите, а Артета во интервјуто за „АС“ нагласи дека наместо страв, чувствува голема возбуда и страст што ќе одигра два меча против Реал Мадрид.

– Не чувствуваме тежина и страв, чувствуваме возбуда што играме против Реал и тоа е чувството кое преовладува во тимот. Ни се падна ривалот кој предизвикува најголема возбуда, станува збор за историски најдобриот тим во Лигата на шампионите, а тоа е така поради сопствени заслуги. Имаме противник кој ќе не предизвика максимално, но едвај го чекаме тоа, – вели Артета, кој во продолжение е запрашан како може да се победи Реал во еден двомеч во најелитното натпреварување:

– Прво и основно, треба да бидеме подобри од нив, мора да веруваме од првата минута и да бидеме ефикасни во клучните моменти од натпреварите. Знаеме дека натпреварите во Лигата на шампионите се решаваат во пресудните моменти. Мора да бидеме најдобри за да го елиминираме Реал, бидејќи во спротивно, шансите се многу мали за нас, – изјави Артета.