Ѓоковиќ го објасни проблемот со окото и за тоа кој ќе му биде главна поддршка во Монте Карло

Новак Ѓоковиќ не успеа да го освои Мастерсот во Мајами, но вели дека го радува фактот што стигнал до финалето и сега со слични амбиции го дочекува настапот во Монте Карло.

Српскиот тенисер ќе има нов обид да стигне до стотиот АТП трофеј без тренерот Енди Мари, кој според заедничкиот договор нема да биде присутен во кнежевството. Ѓоковиќ вели дека негова главна поддршка ќе му биде братот Марко, кој ќе ги следи мечевите од трибините.

– Во ниту еден момент немавме договор со Мари дека ќе ме следи на овој турнир. Затоа, присуството на мојот брат Марко ќе ми помогне на поинаков, емотивен начин, – рекол Ѓоковиќ.

Тој открил и каков проблем имал во Мајами, односно во финалето кое го играше со видлив проблем на окото.

– Се работи за вирусна инфекција, ми се појави пред полуфиналето и ми правеше проблеми во финалето, но сега се повлекува, – открил третиот носител на Мастерсот во Монте Карло.

Ѓоковиќ ќе биде слободен во првата рунда, а во втората ќе се соочи со подобриот од дуелот меѓу Вавринка и Табило.