Одличниот Поповски го реши швајцарскиот шампион, квалитетни изданија на Димитриоски и Карапалевски за Валјадолид

Македонскиот интернационалец, Мартин Поповски со одличен настап одигра клучна улога во големата победа на Амичитија Цирих над актуелниот швајцарски шампион Кадетен Шафхаузен.

Цирих пред своите гледачи славеше со 32:28, а лидер во победата беше токму Поповски кој беше прв стрелец со шест постигнати голови. Клучната предност беше направена во вториот дел, период кој домаќините го добија со 17:13.

Со вкупно 29 бода Мартин и другарите се на четвртата позиција на табелата.

Во Шпанија пак заврши победничката серија на Валјадолид за кого настапуваат Димитар Димитриоски и Мартин Карапалевски. Четата на Писонеро по шесте триумфи во низа падна кај Ла Риоха со резултат 34:27.

Македонските играчи одиграа солидно, Карапалевски имаше реализација два од три, крилото Димитриоски три од четири.