Вилнев: Во Ферари знаат дека се во голема неволја

Тандемот Шарл Леклер-Луис Хамилтон не успеа да го подобри впечатокот од претходните трки во денешните квалификации во Јапонија, а поранешниот светски Формула 1 шампион, Жак Вилнев, смета дека италијанскиот тим е свесен за своето заостанување зад ривалите.

Леклер ќе стартува од четвртата, а Хамилтон од осмата позиција на утрешната трка, што е доказ за уште еден просечен настап на Ферари и не дава голема надеж кај фановите во однос на главниот настан на „Сузука“.

– Во Ферари знаат дека се во голема неволја и не знаат како да се подобрат.

– Гледаат како ривалите одат напред, ги подобруваат перформансите, тоа не е воопшто добро за Ферари, – изјавил Вилнев, кој ја освои Ф1 титулата во 1997 година со Вилијамс.

Црвените болиди го загубија пласманот на трката во Кина поради казни за технички недостатоци, додека најдобар момент за тимот сезонава е првото место на Хамилтон на спринт трката во Шангај.