Реал Мадрид очекува суспензија за еден играч за дуелот со Арсенал

Реал Мадрид ќе се соочи со Арсенал во четвртфиналето на Лигата на шампионите, а шпанскиот клуб стравува дека ќе остане без важен првотимец на првата средба со „топчиите“.

УЕФА утре треба да ја соопшти одлуката на дисциплинската комисија за случајот во кој поведе истрага за недолично однесување на четири играчи на Реал.

Истрага се води за потезите на Килијан Мбапе, Винисиус, Дани Себалјос и Антонио Ридигер по завршувањето на реваншот со Атлетико Мадрид во претходната фаза, но во Реал сметаат дека закана за суспензија има само за германскиот дефанзивец.

Потегот на Ридигер се смета како порадикален и можно е да повлече суспензија на еден натпревар, додека останатите тројца веројатно ќе поминат со опомена.

Во истрагата беше вклучен и Атлетико, клубот кој поради незадоволството од однесувањето на играчите на Реал испратил видеа со нивните потези до УЕФА.