Ентони и Хауард ги предводат новите членови на Куќата на славни, повторно немаше место за Ивковиќ

Кошаркарската Куќа на славни од денеска има нови членови и тоа од генерацијата за 2025 година, во која се вклучени поранешни играчи во машка и женска конкуренција, кошаркарски работници и еден судија.

Кармело Ентони и Двајт Хауард се две НБА легенди кои влегуваат во престижното друштво и меѓу најдобрите во историјата на кошарката, а друштво им прават Маја Мур, Сју Брд и Силвија Фаулс како претставнички на женската кошаркарска сцена.

Во ова друштво ќе биде и тренерот Били Донован, судијата Дени Крофорд и еден од сопствениците на Мајами, Мики Арисон.

Тимски влез во Куќата на славни обезбеди американската олимписка репрезентација од 2008 година, во која настапуваа и Ентони и Хауард, исто како и ЛеБрон Џејмс и Крис Пол, двајца активни играчи кои веќе влегоа во престижното семејство уште пред да ја завршат кариерата.

Годинава е една од ретките во која во Спрингфилд не е обезбедено место за претставник на меѓународната кошаркарска сцена, па легендарниот српски тренер Дуда Ивковиќ како единствен финалист, повторно не доби се чини заслужено место во кошаркарската фамилија на големи имиња.