Европската лига се распадна како кула од карти по само два дена: Вечерва клучен состанок за откажување

Огромното несогласување од јавноста и реалните критики упатени кон креаторите на контроверзната Европска Супер лига доведоа до тоа сите 12 клубови да одлучат да се повлечат од намерата за формирање на ново натпреварување.

УЕФА и ФИФА уште вчера се заканија дека ќе им забранат на клубовите учество во натпреварувањата организирани под нивна капа, а постоеше реална закана за забрана за учество и во домашните шампионати.

Поттикнати од притисокот од јавноста, први потег повлекоа од Челси од каде се откажаа од новоформираната лига и тоа беше поздравено од страна на навивачите на клубот од Лондон.

Потоа стигнаа најави дека и Манчестер Сити, Атлетико Мадрид, па дури и Манчестер Јунајтед, клуб кој беше меѓу организаторите, ќе се откажат од лигата, за сега „TalkSPORT“ да пренесе дека претставници на сите 12 клубови вечерва ќе имаат итен состанок на кој ќе разговараат за откажување на Европската Супер лига.

Огромниот притисок од јавноста си го стори своето, па Супер лигата на Перез и компанија заживеа само на хартија, не и во реалноста. Како што стојат работите, навивачите може да останат смирени и да не очекуваат крупни промени во фудбалот во догледно време.